Абдыш-Ата заводунда пландан тышкаркы салыктык текшерүү жүргүзүлдү
12-майда сыра жана алкоголсуз суусундуктарды чыгарган Кант шаарындагы «Абдыш-Ата» заводунда пландан тышкаркы салыктык текшерүү жүргүзүлдү. Бул тууралуу ЖМКлар ишканадагы булактарга таянып жазып чыгышты.
Kaktus.media редакциясы ишканага Салык кызматынын инспекторлору келгенин кабарлады. Маалыматты «Абдыш-Ата» ишканасынын башкы директору Азат Сакебаев тастыктады.
«Пландан тышкаркы салыктык текшерүү жүрүп жатат. Бизде акциздик товарлар бар», - деп түшүндүрдү Сакебаев.
Ишкананын кызматкерлери 24.kg басылмасына анын ишине жарым-жартылай бөгөт коюлганын, сыра ташууга тыюу салынганын билдиришкен. Завод энергетикалык суусундукту гана чыгарып жатат. Бирок бул маалымат заводдо расмий түрдө четке кагылды. Компания салык боюнча гана текшерүү жүргүзүлгөнүн айтууда.
«Завод штаттык режимде иштеп жатат. Эч кандай издөө иштери жүргүзүлгөн эмес», - деп заводдо билдиришти.
