КРУБ коммерциялык банктар менен санкциялардын тобокелдиктерин талкуулады
2023-жылдын 23-майында Улуттук банк коммерциялык банктардын комплаенс-кызматтары менен жолукту. Маалымат КРУБнын расмий сайтында жарыяланган.
Такталгандай, жолугушууда санкциялар жана санкциялардан улам кошумча тобокелдиктердин таасири боюнча актуалдуу маселелер ортого салынды.
«Жолугушууда АКШ жана Европа бирлиги тарабынан КРнын экономикалык өнөктөш өлкөлөрүнө карата чектөө чаралары киргизилген учурдан тартып Улуттук банк КРнын банк системасына санкциялардын терс таасирине бөгөт коюу жана банктык корреспонденттик мамилелердин токтоп калуу тобокелдиктерине жол бербөө максатында тиешелүү иштерди жүргүзүүдө», - деп билдирүүдө белгиленет.
Атап айтканда, Улуттук банк туруктуу негизде коммерциялык банктарга санкциялардан улам кошумча тобокелдиктердин таасири жөнүндө маалымдап турат жана санкцияларга жол бербөө максатында коммерциялык банктарга OFAC, Европа бирлигинин санкциялык тизмегине кирген товарлар жана жактар менен операцияларды контролдоону күчөтүү жана аларга жол бербөө боюнча чараларды кабыл алууну сунуштайт.
Мындан тышкары жолугушууда коммерциялык банктарга, банктын кардарларын тейлөөдө, санкциялар аларга карата киргизилген юрисдикциядагы жактар менен операцияларга өзгөчө көңүл буруу жана ички контролдукту күчөтүү чараларын көрүү ишин улантууну сунуштады.
