Чаткалда кен казуучу ишкананын калдыктары Кара-Касмак суусуна жакындап кеткен
Жерди жана сууну көзөмөлдөө кызматы Чаткал районунун Жамгыр участкасында ишмердик жүргүзүп жаткан «Вертекс Голд Компани» жана «Глобал Жамгыр Майнинг» ЖЧКларына карата текшерүү жүргүзүлдү. Бул тууралуу мекеменин маалымат кызматы кабарлады.
Маалыматка ылайык, текшерүү жергиликтүү тургундардын арызынын негизинде жүргүзүлдү. Текшерүү учурунда арызда көрсөтүлгөндөй, «Вертекс Голд Компани» ЖЧКсы тарабынан алтын казуудан калган калдыктар Кара-Касмак суусуна жакындап баратканы аныкталды. Аталган ишканага жер жана суу мыйзамдарын бузуу боюнча талаптарды четтетүү боюнча 3 пункттан турган жазма буйрук берилди.
Ал эми «Глобал Жамгыр Майнинг» ЖЧКсын текшерүүдө Чаткал райондук мамлекеттик администрациясынын токтомунун негизинде жер аянты бөлүнүп берилген. Бул боюнча жыл сайын берилип туруучу №2 ТП (Жерлерди рекультивациялоо жана аларды пайдаланууга кабыл алуу тартиби) отчету берилген эмес. Аталган ишканага да жер жана суу мыйзамдарын бузууга жол бербөө боюнча 4 пункттан турган жазма буйрук берилди.
