Чикагодо Кыргызстандын биринчи маданий жана соода көргөзмөсү ачылды
2023-жылдын 18-июлунда Чикагонун борборунда Кыргызстандын биринчи маданий жана соода көргөзмөсүнүн расмий ачылыш аземи болуп өттү, анда «Кыргызстанда жасалган» эксклюзивдүү продукциялар коюлган. Бул тууралуу Тышкы иштер министрлиги билдирди.
Кыргызстандын Чикаго шаарындагы Башкы консулдугунун демилгеси жана мекендештерибизге тиешелүү болгон 5 компания менен биргелешкен ийгиликтүү ишинин жыйынтыгында Чикаго шаарындагы 80ден ашык чет мамлекеттердин дипломатиялык өкүлчүлүктөрүнүн арасындагы «Маданий көргөзмөлөр» сынагында Кыргызстан 4 жеңүүчүнүн бири болгон.
Бул долбоордун алкагында 4 ай бою Чикагонун туристтер эң көп келген жеринен Кыргызстандын маданий жана соода көргөзмөсүн өткөрүү үчүн имарат бөлүнгөн.
Чикагого туристтик агымды эске алуу менен бул долбоор кыргыз продукциясын АКШга экспорттоону, Кыргызстандын таанылышын, туристтик потенциалын жана маданиятын даңазалоого мүмкүндүк берет.
Кыргызстандын маданий жана соода көргөзмөсү күн сайын саат 11.00дөн 19.00гө чейин ачык жана The Wrigley Building 400 N Michigan Ave, Chicago, IL 60611, US дарегинде жайгашкан.
Байланыш телефону: +1 312 898 4581. Инстаграм: @immersive_kg
