Талас районундагы дарыяларына дагы 20 миң форелинин чабактары кое берилди – долбоорду «Альянс Алтын» колдооду
Балык запастарын калыбына келтирүү максатында Талас районундагы жайлоодо жайгашкан Түз-Ашуу жана Чоң-Чычкан дарыяларына дагы 20 000 севан форелинин чабактары кое берилди. Бул демилге Талас регионалдык жаратылыш ресурстары, экология жана техникалык көзөмөл башкармалыгы тарабынан «Альянс Алтын» компаниясынын каржылык колдоосу менен ишке ашырылды. Бул тууралуу ишкананын маалымат кызматы билдирди.
Экологдордун айтымында, тандалган жерлер форель балыктарынын өсүшү үчүн жагымдуу табигый шарттарга ээ: салкын, кычкылтекке бай суу жана туруктуу температуралык режим жаш балыктардын өнүгүшү үчүн идеалдуу чөйрө түзөт. Чабактар Ысык-Көл облусундагы Тоң балык заводунан алынып келинген жана бардык ветеринардык сертификаттарга ээ.
Бул аймактагы балык популяциясын калыбына келтирүү боюнча иш-аракеттердин биринчи этабы эмес. Буга чейин эле ушул эле суу объектилерине 35 000 чабак коё берилген болчу. Адистердин байкоосуна караганда, 2,5 жыл ичинде айрым балыктар 23 сантиметрге чейин жеткен, бул алардын жакшы өсүшүн жана жогорку жашоо деңгээлин тастыктайт.
Акыркы жылдары Талас облусунун дарыяларындагы балык санынын кескин азайышы мыйзамсыз аңчылык жана экологиялык тең салмактын бузулушу менен байланыштырылат. Бул маселени чечүү үчүн экологдор коомдук жоопкерчиликтүү бизнес менен биргеликте биоресурстарды калыбына келтирүү боюнча системдүү иштерди улантып жатышат.
«Альянс Алтын» компаниясы туруктуу өнүгүү жана аймактагы жаратылыш ресурстарын сактоо принциптерин бекем карманарын баса белгилейт. Тиешелүү мамлекеттик органдар менен биргелешкен аракеттер биологиялык ар түрдүүлүктү сактоого жана экологиялык туруктуулукту камсыздоого багытталган.
