Кыргызстанда Доре алтын куймасы алгач ирет кайра иштетилди
«Кыргызалтын» ААК Монголиянын Борбордук банкы тарабынан жөнөтүлгөн Доре куймасы түрүндөгү алтын камтыган чийки затты өлкө аймагында кайра иштетүү боюнча биргелешкен долбоорду ийгиликтүү ишке ашырды.
Компаниянын маалыматына ылайык, бул — Кыргызстандын эгемендүүлүк тарыхында чет элдик Доре куймасын өлкө ичинде кайра иштетүүнүн биринчи учуру болуп, баалуу металлдар тармагындагы кыргыз-монгол кызматташтыгынын жаңы баскычы катары бааланууда.
Долбоордун алкагында “Кыргызалтын” заманбап технологиялык мүмкүнчүлүктөрүн колдонуп, 999,9 сапаттагы жогорку тазалыктагы алтын өндүрүлүп, дүйнөлүк рынокто сатуу ишке ашырылды. Жалпы түшкөн каражат 12 млн доллардан ашты.
Ишкана эл аралык LBMA ("Good Delivery") аккредитациясына ээ болуп, өндүрүштүк жана лабораториялык стандарттары дүйнөлүк талаптарга шайкеш экенин дагы бир жолу тастыктады. Бул “Кыргызалтынга” чет өлкөлүк өнөктөштөр менен иштешүүгө жана баалуу металлдарды эл аралык рынокто сатууга мүмкүнчүлүк берүүдө.
