Талас өнүктүрүү фонду минералдык суу чыгаруучу кичи заводду ишке киргизүүгө колдоо көрсөттү
Талас районунун Беш-Таш айылында быйыл күзүндө Арашан бренди менен ичүүчү минералдык суу чыгаруучу кичи завод иштей баштайт. Долбоор Талас районунун өнүктүрүү фондунун каржылык колдоосу менен ишке ашырылууда. Бул тууралуу Айыл чарба министрлиги билдирди.
Башкармалыкта белгиленгендей, ишкананын курулушуна 10,1 млн сом каралса, анын 7 млн сому жабдууларды сатып алууга бөлүнгөн. Курулуш иштери аяктап, учурда өндүрүштүк линияны сатып алуу боюнча тендер өткөрүлүүдө.
Завод ишке киргенден кийин 10го чейин жумуш орундары түзүлөт. Өндүрүш жергиликтүү калкты сапаттуу минералдык суу менен камсыз кылып, райондун социалдык-экономикалык абалынын жакшырышына салым кошот.
Талас өнүктүрүү фонду тарабынан облустун айыл чарбасын, инфраструктурасын колдоо жана калктын жашоо деңгээлин жогорулатууга багытталган долбоорлорду ишке ашыруу уланууда.
