Лейлекте эми газоблок чыга баштайт
Лейлек районунда өлкөдөгү эң ири автоматтык жана автоклавдык газоблок өндүрүүчү эко-завод жакында ишке берилерин “Кабар” маалымат агенттигине заводду негиздеген “Газоблок KG” ЖЧКсынын жетекчиси Нурсланбек Балтабаев билдирген.
Завод жылына 12 млн даана( 432 миң куб метр) газоблок, тагыраагы суткасына 1 миң 200 куб метр газоблок өндүрө алат. Ишкана ээсинин айтымында, заводду курууга жалпы 12 млн доллар инвестиция тартылган. 5 гектарды ээлеген ишканада азыр жабдууларды орнотуу иштери жүрүүдө.
“Мындай ири газоблок чыгаруучу завод буга чейин Кыргызстанда болгон эмес. Лейлек районуна завод ачканыбыздын себеби, аймактагы миграцияны токтотууга салым кошуу. Район чек арага чектеш болгондуктан, жарандар миграцияга кетип, ишке жарамдуулар аз”, - деди Балтабаев.
Аталган заводдо газоблок Германия технологиясы менен өндүрүлүп, экологияга терс таасирин тийгизбейт. Ишкана иштеп баштаса 120 адам иш менен камсыз болот. Эске салсак, буга чейин кыргызстандыктар газоблокту Өзбекстандан сатып алып келишкен.
