Атайын долбоор алкагында ишкерлерге 9 млрд 435 млн 925 миң сом үстөк пайызсыз насыя берилди
“Чакан жана орто ишканаларды ыкчам колдоо” долбоорунун алкагында ишкерлер 9 млрд 435 млн 925 миң сом үстөк пайызсыз насыя алышканын “Биринчи радио” эфиринде Финансы министрлигинин насыялык линияларды башкаруу бөлүмүнүн директору Бермет Мусакожоева билдирди.
Анын айтымында, долбоордун ишке кирген мезгилинен тартып 2025-жылдын октябрына чейин 11 821 ишкер финансылык жардам алышкан.
Анын ичичнде 1-категория боюнча (1 миллион сомго чейин) 9 630 ишкерге 5 млрд 752 млн сом берилген. 2-категория (3 миллион сомго чейин) боюнча 2 191 ишкер 3 млрд 703 млн сом алган.
Мусакожоеванын билдиришинче, бул жерде аял-ишкерлерге өзгөчө акцент жасалып, 6 949 аялга жалпы 4 млрд 964 млн сом үстөк пайызсыз насыя берилген.
“Мындай каржылоо бардык региондордо жүрүп жатат. Ош облусу менен Бишкек пайызсыз насыя алуу боюнча ай сайын алдыга чыгып жатат. Ошондой эле Жалал-Абад, Ысык-Көл жана Чүй облустары да бул жагынан башка региондорго салыштырмалуу алдыда келатат”,-дейт Б.Мусакожоева.
Буга улай ал “Чакан жана орто ишканаларды ыкчам колдоо” долбоору 2021-жылы мартта ишке киргенин жана анын башкы максаты бизнеске катаал учурда жардам берүү болгонун кошумчалады.
