Ишкерлерге жеңилдетилген насыялар 500 миңден 5 млн сомго чейин берилет
Ишкердикти өнүктүрүү фонду мал чарбачылыгын колдоо максатында насыя берүү чегин көбөйттү. Эми мал сатып алуу үчүн насыянын максималдуу суммасы 2 млн сомдон 3 млн сомго чейин жетет. Бул тууралуу аталган фонддон билдиришти.
Асыл тукум мал сатып алуу үчүн ишкерлер 5 млн сомго чейин насыя ала алышат. Жылдык пайыздык чен — 16%, насыянын мөөнөтү — 60 айга чейин.
Мал чарбачылыгы менен алектенген жеке ишкерлерге жана жарандарга насыялар берилет. Патенти жок, бирок мал багуучу адамдар 500 миң сомго чейин насыя ала алат, ал үчүн малдын бар экендигин тастыктаган ветеринардык маалымкат талап кылынат.
Мындан тышкары, сарай куруу үчүн 3 млн сомго чейин каражат алуу мүмкүнчүлүгү бар. Фонддун маалыматына караганда, бул жеңилдетилген насыялар ишкерлерди колдоо жана мал чарбачылыгын өнүктүрүү максатында берилүүдө.
Толук маалымат алуу үчүн фонддун колл-борборуна 0559 956 799 номери аркылуу кайрылсаңыз болот.
