Талас төө буурчагын экспорттоодо логистикалык көйгөй бар
“Кыргыз Агрохолдинг” ААКсы менен “Алтай Агро” ЖЧК 100 млн сомго Таластын дыйкандарынан 95 сомдон төө буурчак сатып алып жатканын “Кабар” агенттигине “Алтай Агро” ишканасынын директору Эрбол Замирбеков билдирди.
“Дыйкандарга колдоо көрсөтүү жана бааларды туруктуу кармоо максатында төө буурчак 95 сомдон сатып алынып жатат. Төө буурчакты биз кайра иштетүүдөн өткөрүп, таңгактап экспортко чыгарабыз. Бүгүнкү күндө Иран, Өзбекстан, Россия, Индия жана башка мамлекеттерге төө буурчакты экспорттоо боюнча келишимдерибиз бар. Биз жогоруда айтып кеткен 100 млн сом суммасындагы каражаттан тышкары да жеке акчабызга төө буурчакты сатып алып жатабыз”, - деди ал.
“Келишимдер бар, алуучу бар, бирок логистикада маселе жаралып жатат. Логистика маселесин айтсак, бул Казакстан менен Россиянин ортосундагы тыгындар, мындан тышкары Иранга продукцияны жеткирүүгө жүк ташуучу унаалар болсо да, кымбатка туруп жатат”, - дейт Эрбол Замирбеков.
