Жыл башынан бери аял ишкерлерге 478 млн сомдон ашык жеңилдетилген насыя берди
Ишкердикти өнүктүрүү фонду өлкө аймагындагы аял ишкерлерге жеңилдетилген насыяларды бере баштады.
Аталган фонддун маалыматына ылайык, насыяны өндүрүш жана кызмат көрсөтүү тармактарында иштеген аял ишкерлер, ошондой эле үлүш ээлеринин кеминде 50%ы аялдар болгон юридикалык жактар ала алышат. Аймактардагы аял ишкерлер үчүн насыялар жеткиликтүү.
Насыя алуу үчүн жеке жактарда ишмердүүлүк патенти же ишкер катары каттоодон өткөнүн тастыктаган күбөлүк, юридикалык жактарда мамлекеттик каттоодон өткөнүн тастыктаган документ талап кылынат.
Насыянын мөөнөтү үч жылга чейин, суммасы 50 миң сомдон 3 млн сомго чейин берилет. Мөөнөттүү жеңилдик каралган. Аялдарга берилүүчү 12%дык насыя Азия өнүктүрүү банкынын колдоосу менен ишке ашууда. Банк аялдар ишкердигин колдоо үчүн 22 млн сом бөлдү, дагы 22 млн сомду фонд өз каражатынан төмөн пайыздык чен менен берет. Натыйжада, аял ишкерлерди колдоо үчүн жалпы 44 млн сом каралган.
Быйылкы он айдын ичинде фонд 253 аял ишкерге насыя берип, алардын бизнесин өнүктүрүүгө жалпы 478 млн 435 миң сом бөлдү.
Насыя алууну каалагандар фонддун колл-борбору (0559 956 799) же расмий сайттагы филиалдарга кайрыла алышат.
