Бишкекте айына 100 миң чарчы метр ковролин чыгарган ишкана ачылды
Бишкек шаарында “Орион Грант” ЖЧКсы айына 100 миң чарчы метрден ашуун ковролин өндүрө турган жаңы ишкананы ишке киргизди. Бул тууралуу Инвестициялар боюнча улуттук агенттиги билдирди.
Маалыматка ылайык, ишкананын ачылышына агенттиктин директору Равшанбек Сабиров катышты. Компания “Бишкек” эркин экономикалык аймагында жайгашып, өндүрүш аянты 4 миң чарчы метрге жакын.
Ишканага Түркиядан келген атайын жабдуулар орнотулду. Жалпы инвестициялардын көлөмү болжол менен 300 млн сомду түзүп, анын ичинен 1 млн АКШ долларын Кыргыз–Азербайжан өнүктүрүү фонду каржылады.
Биринчи этапта ишкана Борбор Азия жана ЕАЭБ рынокторуна багытталган ковролиндин төрт түрүн чыгарат. Ал эми ишкананын базасында 30 жаңы жумушчу орун түзүлгөн.
