Ак-Талаада сафлор майын өндүрүүчү ишканага жаңы жабдуулар орнотулду
Ак-Талаа районуна ВВП ООН долбоорунун каржылоосу аркылуу сафлор майын чыпкалоочу ишканага Түркиядан жаңы өндүрүштүк жабдуулар алынып келди. Бул тууралуу Суу ресурстары, айыл чарба жана кайра иштетүү өнөр жайы министрлиги ишкананын ээси, жеке ишкер Акылбек Абдылдаевге шилтеме берүү менен билдирет.
Маалыматка ылайык, жаңы линия суткасына 800 кг сафлор майын сыгууга мүмкүнчүлүк берет. Учурда жабдуулар орнотулуп, ишкана жакынкы күндөрү толук иштей баштайт.
Буга чейин ишкана кардарлардын талабына жараша күнүнө 50 литрге чейин гана май чыгарып келген. 2023-жылдан бери иштеп келе жаткан өндүрүш өткөн жылы 5 тонна, быйыл 10 тоннадан ашык сафлор уругун кайра иштетти.
Учурда сафлор майынын баасы 1 литри 200 сом.
Жаңы жабдуулардын орнотулушу райондогу кайра иштетүү тармагын өнүктүрүүгө, жаңы өндүрүштүк мүмкүнчүлүктөрдү түзүүгө жана жергиликтүү ишкерлерди колдоого багытталган.
