Ошто 8 логистикалык борбор жана 53 кайра иштетүү ишканасын ачуу пландалууда
Суу ресурстары, айыл чарба жана кайра иштетүү өнөр жайы министрлиги 2030-жылга чейин айыл чарба продукциясын кайра иштетүүнү 25%га чейин жеткирүү максатында республика боюнча 385 жаңы ишкана курууну көздөйт. Бул тууралуу ведомстводон билдиришти.
Ош облусу боюнча жүргүзүлгөн анализдин негизинде 8 соода-логистикалык борбор (СЛБ) жана 53 кайра иштетүү ишканасын ачуу пландалууда. Бул объектилер өсүмдүк жана мал чарба продукцияларын сактоо, жоготууларды азайтуу жана кайра иштетүү мүмкүнчүлүктөрүн кеңейтет. Ишканалар жашылча-жемиш, мөмө-жемиш, жүзүм, эт, сүт, жүн жана күрүч тармактарын камтыйт.
Райондор боюнча пландар:
• Кара-Суу району – 1 СЛБ, 10 кайра иштетүү ишканасы
• Ноокат району – 1 СЛБ, 8 ишкана
• Кара-Кулжа району – 4 ишкана
• Алай району – 1 СЛБ, 4 ишкана
• Араван району – 1 СЛБ, 6 ишкана
• Өзгөн району – 2 СЛБ, 6 ишкана
• Чоң-Алай району – 5 ишкана
• Ош шаары – 1 СЛБ, 3 ишкана
Министрликтин маалыматына ылайык, бул пландар райондордун адистешүүсү эске алынып түзүлгөн. Ишканалар туруктуу чийки зат менен камсыздалат, натыйжада айыл чарба продукциясынын жоготуусу кыскарып, жаңы жумуш орундар пайда болот жана агроөнөр жай комплекси күчөйт.
Министрлик аталган долбоорлорду жергиликтүү бийлик органдары менен биргеликте ишке ашырып, ишкерлерди жана потенциалдуу инвесторлорду кызматташууга чакырат. Бул демилгелер аймактарда кайра иштетүү тармагын жана агробизнесин өнүктүрүүгө кеңири мүмкүнчүлүк түзөт.
Суроолор боюнча: 0708 320 820, 0990 559 083 номурларына кайрылсаңыздар болот.
