"Альянс Алтын" фонду Арашан айылындагы суу түтүгүн жаңылоону каржылады
"Альянс Алтын" өнүктүрүү фонду Талас облусунун Арашан айылындагы таза суу менен камсыздоо системасын жаңылоону каржылап, долбоорду ишке ашырууга 4 млн 378 миң сом бөлдү.
Беш-Таш айыл аймагындагы бул айылдын тургундары инфраструктуранын эскилиги жеткендиктен, жылдар бою таза сууга жетүүдө кыйынчылык тартып келишкен. Акыркы үч жылда абал курчуп кеткен: эски коммуникациялар бат-баттан иштен чыгып, түтүктөр жарылып, үйлөргө сууну туруктуу берүү мүмкүн болбой калган.
Жаңы долбоор бул көйгөйдү толугу менен чечүүгө багытталган. Бөлүнгөн каражатка подрядчылар 2 чакырымдан ашык авариялык абалдагы түтүктөрдү алмаштырышат. Суу менен камсыздоо системасын реконструкциялоо иштери заманбап техникалык стандарттарды сактоо менен жүргүзүлүүдө, бул түйүндөрдүн узак мөөнөткө жана үзгүлтүксүз иштешин камсыздайт.
Калкты таза суу менен камсыздоо — фонддун аймактагы ишинин артыкчылыктуу багыттарынын бири бойдон калууда. Жалпысынан Талас облусу боюнча «Альянс Алтын» буга окшош 25 долбоорду ишке ашырып, суу инфраструктурасын модернизациялоого 45 млн сомдон ашык каражат жумшаган.
