Гидропоника ыкмасы менен органикалык ширелер өндүрүлүүдө
2022-жылдын май айынан тарта Нуралиева Мунара гидропоника ыкмасын ийгиликтүү өздөштүрүп, "Витадаам" компаниясын негиздеген. Бүгүнкү күндө аталган компания буудайдан өндүрүлгөн жашыл чөптү пайдаланып, витаминге бай, органикалык сок даярдоо менен алектенип келет. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Компаниянын өндүрүш процесси толугу менен экологиялык талаптарга жооп берип, эч кандай химиялык кошулмалар колдонулбайт. Бул "Витадаамдын" продукциясын коопсуз, таза жана саламаттык үчүн пайдалуу кылат.
Мындан тышкары, сок өндүрүүдөн калган калдыктар кайра иштетилип, мал чарбасында пайдалуу тоют катары колдонулууда. Мындай ыкма ресурстарды үнөмдүү пайдаланууга шарт түзүп, айыл чарбасында туруктуу өнүгүүнү камсыздоого өбөлгө түзүүдө.
"Витадаам" компаниясынын ишмердүүлүгү саламат жашоо образын колдоого багытталып, жергиликтүү рынокко сапаттуу жана органикалык продукция сунуштоону негизги максат катары коюуда. Бул демилге экологиялык таза өндүрүштү өнүктүрүү менен катар, ички рынокто органикалык азык-түлүккө болгон суроо-талапты канааттандырууга салым кошууда.
