Жеке ишкерлер онлайн режимде кайра каттала алышат
Эми жеке ишкерлер мамлекеттик салык кызматынын cabinet.salyk.kg сайты аркылуу онлайн режиминде кайра каттоо боюнча арыз тапшыра алышат. Процесс толугу менен автоматташтырылып, арызды кароо убактысы болгону 5-10 мүнөттү түзөт.
Салык кызматынын маалыматына ылайык, жеке ишкерлер жаңы сервисти колдонуу менен төмөнкү операцияларды жүргүзө алышат:
- юридикалык даректи өзгөртүү (анын ичинде башка районго өткөндө);
- салыктык каттоо районун өзгөртүү;
- салык режимин жана реквизиттерин өзгөртүү;
- ишмердүүлүктүн жаңы түрлөрүн кошуу.
Сервис күнү-түнү — 24/7 режиминде иштейт жана Кыргызстандын жана дүйнөнүн каалаган бурчунан жеткиликтүү. Мурда арыздарды кароо 2–3 жумушчу күн талап кылса, эми процесс 5–10 мүнөттө бүткөрүлөт.
