Таласта 350 млн долларлык мунай иштетүүчү комплекстин курулуусу каралууда
Талас облусунда түз айдалган бензинди жана дизелдик фракцияны кайра иштетүүчү өнөр жай комплексин куруу пландалууда. Долбоорго болжол менен 350 млн доллар инвестиция тартуу каралууда. Бул тууралуу Экономика жана коммерция министрлиги билдирди.
Долбоорду ишке ашыруу боюнча министр Бакыт Сыдыков менен казакстандык QAZAQ BITUM Processing компаниясынын директору Ержан Бейсебаев өз ара түшүнүшүү жөнүндө меморандумга кол коюшту.
Документте түз айдалган бензинди жана дизелдик фракцияны кайра иштетүү, ошондой эле полимер менен модификацияланган PG битумун өндүрүү боюнча комплекстин долбоорун иштеп чыгууда жана ишке ашырууда кызматташуу каралган.
Министрликтин маалыматына ылайык, долбоор ички өндүрүштү көбөйтүүгө, импортко көз карандылыкты азайтууга жана аймакка жаңы технологияларды тартууга багытталган.
Белгилей кетсек, QAZAQ BITUM Processing компаниясы Казакстанда иштеп, жол битумун жана полимер менен модификацияланган битум өндүрөт. Компания мунайды кайра иштетүү продукцияларын өндүрүүчү катары катталган.
