Дүйнөлүк банк: Кыргызстанда экономикалык өсүш бар, бирок...
Дүйнөлүк банк Кыргызстандын экономикалык абалын терең иликтеп, өлкөнүн туруктуу өсүүсүнө тоскоол болуп жаткан көйгөйлөрдү аныктаган экономикалык баяндамасын жарыялады.
Докладка ылайык, 2000-2024-жылдар аралыгында Кыргызстандын ички дүң продукциясы (ИДП) жыл сайын орточо 4,7%га өсүүдө. Бирок ошол эле учурда өлкөдө жумушчулардын 70%ы формалдуу эмес сектордо иштегени үчүн төмөнкү маяна алышат.
Кыргызстандын экономикалык өсүшү негизинен капитал топтоо жана инвестициялардын, айрыкча кен-металл өндүрүш тармагынын эсебинен камсыз болууда. Бирок квалификациялуу кадрлардын жетишсиздиги эмгек рыногунда олуттуу көйгөй жаратып, туруктуу өнүгүүгө тоскоол болууда. Ишканалар өндүрүмдүүлүктү жогорулатууга жана технологияларды өздөштүрүүгө жөндөмдүү адистерге муктаж.
Бул маселелерди чечүү үчүн Дүйнөлүк банк бир катар конкреттүү сунуштарды берген:
Бизнес жүргүзүү шарттарын жөнөкөйлөтүү;
Антимонополия мыйзамдарын күчөтүп, мамлекеттик компаниялардын ишин көзөмөлдөө;
Чет элдик инвестицияларды тартууга тоскоолдуктарды жоюу;
Соода жана логистикалык инфраструктураны жакшыртуу;
Адистерди заманбап технологияларга даярдоо.
Мындан тышкары, Кыргызстанда 2025-жылга карата жалпы сугат жерлердин аянты 1 023 миң гектарга жетет бирок, алардын көпчүлүгү оңдоону талап кылат. 2030-жылга чейин 36,9 миң гектар жаңы сугат жерлер өздөштүрүлөт деп пландалууда.
