Кыргызстан менен ЭКӨУ экономикалык туруктуулук үчүн кызматташат
Кечээ, 9-октябрында Экономика жана коммерция министри Бакыт Сыдыков Экономикалык кызматташтык жана өнүктүрүү уюмунун (ЭКӨУ, OECD) Борбор Азия боюнча долбоорунун жетекчиси Стивен Томпсон менен жолугушту. Жолугушууга Улуу Британиянын Кыргыз Республикасындагы Элчиси Николас Боулер да катышты.
Министрликтин маалыматына ылайык, жолугушууда тараптар Кыргыз Республикасы менен ЭКӨУнүн кызматташтыгын кеңейтүү жана чыңдоо тууралуу сүйлөшүштү. Талкуу региондук «Борбор Азиядагы критикалык мааниге ээ минералдарды башкаруунун коопсуздугун жана ачыктыгын жогорулатуу» аттуу долбоорунун алкагында өттү.
Жолугушууда салык саясаты, минералдарды жоопкерчиликтүү пайдалануу, ошондой эле экологияны коргоо маселелери талкууланды.
Жыйынтыгында эки тарап тең биргеликте иштеп, эл аралык тажрыйба алмашууга кызыкдар экенин билдиришти. Бул кызматташтык Кыргызстандын экономикасын бекемдеп, туруктуу өнүгүүсүнө көмөктөшөт.
