Бишкек-2028: Кыргызстан эл аралык каржы борборуна айланабы?
Эл аралык валюта фондунун жана Дүйнөлүк банк тобунун жылдык жыйынынын алкагында Финансы министри Алмаз Бакетаев Дүйнөлүк банктын Швейцариялык добуш берүү тобунун аткаруучу директору Беатрис Мазер менен жолугушту. Бул тууралуу Финансы министрлигинен билдиришти.
Маалыматка ылайык, жолугушууда тараптар Кыргызстандын Эл аралык реконструкция жана өнүктүрүү банкындагы (ЭРӨБ) квотасын жогорулатуу, ЭӨА–21 алкагындагы каражаттарды бөлүштүрүү, ошондой эле бюджеттик колдоо көрсөтүү маселелерин талкуулашты.
Министр Алмаз Бакетаев Дүйнөлүк банкка жана Швейцариялык топко реформаларды жана артыкчылыктуу долбоорлорду колдогону үчүн ыраазычылык билдирип, Кыргызстандын Дүйнөлүк банктын Директорлор кеңешинин ишине катышуусунун стратегиялык маанисин белгиледи.
Ошондой эле жолугушууда өнүктүрүү саясатын колдоо программасы (ӨСКП), Камбарата-1 ГЭС долбоорунун келечеги жана 2028-жылы Бишкекте Дүйнөлүк банктын шайлоо округунун жыйынын өткөрүү сунушу талкууланды.
Министр кыргыз тарап ар тараптуу кызматташтыкты улантууга жана биргелешкен демилгелерди ишке ашырууга толук даяр экенин белгиледи.
