Казак профессору Е.Утешов тоо кен тармагын өнүктүрүүдөгү негизги 3 чакырыкты белгиледи

Бишкекте өткөн эл аралык тоо форумунда Д.А.Кунаев атындагы тоо иштери институнун профессору Ержан Утешов илимге негизделген стратегиялык өнөктөштүк Борбор Азиянын тоо кен жана металлургиялык тармагынын узак мөөнөттүү жана туруктуу өнүгүшүнүн өзөгү болушу керектигин баса белгиледи. 

Буга улай ал Казакстан, Кыргызстан экономикасынын фундаменти болгон тоо-метталургиялык комплекси дүйнө рыногунда аттандаштыкты жогорулатыш үчүн бир катар стратегиялык чакырыктарга жооп бериши керектигин билдирди. 

Ал биринчи чакырык – оңой жеткиликтүү болгон кен корлорунун түгөнүп бара жатканы экенин белгилеп, Борбор Азия региону пайдалуу компоненттери аз жана тоо-геологиялык шарттары татаал кен байлыктарды иштетүү этабына өтүп жатканын билдирди.

Экинчи чакырык – экологиялык талаптардын катталданышы жана өнөр жай коопсуздугун жогорулатуу экенин айткан профессор азыркы дүйнө коомчулугу кен өндүрүүчүлөрдөн кен байлыкты өндүрүүнү гана эмес, “жашыл принциптерди” сактоону жана жоопкерчиликтүү өндүрүштү талап кылып жатканын ортого салды.

Үчүнчү чакырык – глобалдык технологиялык жарыш экенин айткан Е.Утешов санариптештирүү, автоматташгтыруу жана жасалма интеллектти киргизүү шартында дүйнөлүк өнөр жай ынтызарлык менен  “акылдуу” өндүрүшкө өтүп жатканын кошумчалады. Инновацияларды киргизбей туруп регионалдык ишканалар аттандаштык артыкчылыгын жана технологиялык коз карандысыздыкты жоготуу тобокелчилигине барып жатышканын айтты.