Кыргызстанда тоо-кен тармагы 9 айда 17 тонна алтын өндүргөн
Жаратылыш ресурстары, экология жана техникалык көзөмөл министрлиги 2025-жылдын 9 айындагы иштин жыйынтыгын чыгарган кеңешме өткөрдү. Бул тууралуу министрликтин “Кыргызгеология” мамлекеттик ишканасы билдирди.
Жаратылыш ресурстары, экология жана техникалык көзөмөл министринин биринчи орун басары Болот Жусупбеков 2025-жылдын 9 айындагы негизги жетишкендиктер тууралуу баяндап, регионалдык башкармалыктардын ишине токтолду. Ал учурда 2 768 субъектке 785,2 млн сом өлчөмүндө төлөмдөр эсептелгенин, бул 2024-жылдын ушул мезгилине салыштырмалуу 1 004 субъект жана 370,4 млн сом көп экенин белгиледи.
Ал эми Кыргызстандын геология кызматынын директору, министрдин орун басары Марат Жусупбеков Тоо-кен жана геология тармагы боюнча баяндама жасады.
Тоо-кен жана геология тармагында 9 айда алтын 17 тонна, көмүр 2,3 млн тонна өндүрүлгөнү маалымдалды. 2021–2025-жылдары сектордун ишканалары мамлекеттик бюджетке 191 млрд сомдон ашык салык жана төлөмдөрдү которушкан. Учурда минералдык ресурстарды пайдаланууга берилген лицензиялардын саны 2 005ке жетип, анын 103ү мамлекеттик ишканаларга берилген.
Жыйындын соңунда ишти эффективдүү жүргүзүүнү жогорулатууга багытталган сунуштар жана сунуштамалар талкууланды.
