Кыргызстан менен Камбоджа креативдүү экономика жаатында кызматташууну талкуулады
Жакартада өтүп жаткан Креативдүү экономика боюнча V дүйнөлүк конференциянын (WCCE 2026) алкагында Кыргызстан менен Камбоджанын эки тараптуу жолугушуусу өттү. Бул тууралуу Экономика министрлиги кабарлады.
Маалыматка караганда, кыргыз тараптан экономика министринин орун басары Беназир Нурланова, финансы министринин орун басары Эрнст Калдыбаев жана Креативдүү индустриялар паркынын төрагасы Данияр Аманалиев катышты. Камбоджадан - Маданият министрлигинин мамлекеттик катчысы Пен Мони Макара.
Тараптар инвестиция, ишкердик, туризм жана креативдүү индустриялар боюнча кызматташууну талкуулады.
Беназир Нурланова Кыргызстандагы экономикалык реформалар жана креативдүү экономика боюнча мамлекеттик саясат тууралуу айтып берди. Данияр Аманалиев Парктын модели, салык режими жана жетишкендиктери менен тааныштырды.
Камбоджа тарап Кыргызстандын тажрыйбасына, айрыкча Парктын институционалдык моделине жана салыктык стимулдарга чоң кызыгуу билдирип, аны изилдөөгө даяр экенин айтты.
Жолугушуунун соңунда тараптар байланышты чыңдоого жана тажрыйба алмашууну улантууга макулдашты.
