Бишкекте Россия жана Кыргызстан аялдарынын экономикалык форум-диалогу өтүп жатат
Бишкек шаарында “Экономиканын туруктуу өнүгүүсү үчүн өнөктөштүк: Россия жана Кыргызстан аялдарынын форум-диалогу” өтүп жатат. Форумдун негизги максаты – эки өлкөнүн аялдарынын экономика, илим, бизнес жана социалдык тармактардагы салымын анализдеп, алардын ортосундагы кызматташтыкты чыңдоо.
Иш-чарага Инвестициялар боюнча улуттук агенттиктин директорунун орун басары Дамирбек Бикулов, Кыргызстандын Аялдар конгрессинин төрайымы Замира Акбагышева, Кыргызстандагы “Росатом” Мамлекеттик корпорациясынын өкүлчүлүгүнүн башкы директору Дмитрий Константинов, Россиянын Федерация Кеңешинин илим, билим берүү жана маданият боюнча комитетинин мүчөсү Ольга Щетинина, “Росатом” аялдар коомунун жетекчиси Александра Рябых, “Кыргызалтын” ААКсы башкармалыгынын төрагасынын орун басары Айша Карпаева сыяктуу көрүнүктүү өкүлдөр, ошондой эле ишкер айымдар, илимпоздор жана коомдук ишмерлер катышууда.
Форумдун ачылышында “Росатом” Мамлекеттик корпорациясынын кадрлар боюнча башкы директорунун орун басары Татьяна Терентьева жана Россиянын Федералдык Жыйынынын Федерация Кеңешинин алдындагы Евразия аялдар форумунун кеңешинин төрайымы Галина Карелова видео кайрылуу жасап, форумдун маанилүүлүгүн белгилешти.
Бул форум аялдардын экономикалык активдүүлүгүн арттыруу, аларды өнөр жай жана технологиялык тармактарга тартуу, ошондой эле илимий жана кадрдык потенциалды өнүктүрүү багытында маанилүү диалогдук аянтча болуп саналат. Катышуучулар туруктуу өнүгүү, кадрдык саясат, илимдеги технологиялык тренддер жана аялдардын стратегиялык тармактардагы ролу тууралуу тажрыйба алмашышат.
Адистер белгилегендей, мындай форматтагы жолугушуулар эки өлкө ортосундагы экономикалык жана социалдык байланыштарды чыңдоого, жаңы өнөктөштүк долбоорлорду ишке ашырууга өбөлгө түзөт.
Форум алкагында Кыргызстан менен Россиянын аялдарынын катышуусунда бир катар келечектүү биргелешкен демилгелерди жүзөгө ашыруу пландалып жатат.
