Касымалиев: Кыргызстандын ИДПсы 2030-жылга чейин 30 млрд долларга жетет
Министрлер Кабинетинин төрагасы Адылбек Касымалиев Улуттук өнүктүрүү форумунда өлкөнүн экономикалык жана социалдык өнүгүүсүндө акыркы жылдары олуттуу жылыштар болгонун белгиледи. Бул тууралуу Өкмөттун басма сөз кызматынан билдиришти.
“Акыркы үч жылда орточо экономикалык өсүү 9%дан ашты. 2025-жылдын 9 айында ИДПнын өсүү темпи 10%га жетти. 2024-жылы ИДПнын көлөмү 1,5 триллион сомдон ашып, 2021-жылга салыштырмалуу эки эсеге көбөйдү. Ал эми 2025-жылдын аягына карата бюджеттик ресурстар 1 триллион сомго жетет”, — деди Касымалиев.
Ал ошондой эле, президент Садыр Жапаров бекиткен 2030-жылга чейинки Улуттук өнүгүү программасы— экономиканы бекемдөө, элдин жашоо сапатын жогорулатуу жана башкаруу системасын жаңылоого багытталганын белгиледи.
Программанын негизги максаттары:
Калктын жан башына ИДПны 4 500 долларга чейин жеткирүү;
ИДП көлөмүн 30 млрд доллардан кем эмес деңгээлде камсыз кылуу;
Орточо жылдык реалдуу өсүштү 8% деңгээлде сактоо;
Адамдык өнүгүү индексин жогорулатуу жана жумушсуздукту 5%дан төмөн кармоо.
Бул максаттарды ишке ашыруу үчүн 919 иш-чараны камтыган беш жылдык план даярдалууда.
“Ар бир чара мамлекеттин туруктуу өнүгүүсүнө жана элдин жыргал жашоосуна кызмат кылууга тийиш. Кыргызстан гүлдөп-өнүгүүнүн жаңы этабына өтүүгө толук даяр”, — деди жыйынтыгында Адылбек Касымалиев.
