Кыргызстан 10 жыл ичинде Дүйнөлүк банктан канча каражат алган?
2014-жылдан 2024-жылга чейин Кыргызстан Эл аралык өнүгүү ассоциациясынан жана Дүйнөлүк банктан жалпы 1,5 млрд доллар суммасында грант, жеңилдетилген насыя алганын КРнын Финансы министрлиги билдирди.
Мунун 594,3 млн доллары грант болсо, а 956,6 млн доллары көп жылдык мөөнөткө берилген жеңилдетилген насыя. Пайыздык катнашта келтирсек алынган каражаттардын 44%ы грант, 56%ы кредит.
Каржылоо өлкөнүн социалдык-экономикалык өнүгүүсүндөгү приоритеттүү тармактарды камтыган. Алар:
Инфраструктура жана транспорт – каражаттын жалпы көлөмүнүн 20%ы, анын ичинде аймактык жолдорду жакшыртуу жана шаардык өнүктүрүү долбоорлору бар.
Энергетика – САSA-1000, электр тармактарын модернизациялоо менен кайра калыптануучу энергия булактарын өнүктүрүү долбоорлорун кошкондо 18 пайыз.
Айыл чарбасы жана суу менен камсыздоо – ирригация боюнча программалар, суу менен камсыздоо жана агрардык кластерлер боюнча программаларды кошкондо 25%.
Билим берүү, саламаттык сактоо жана социалдык коргоо – “Келечек үчүн билим берүү” долбоорун, соцжардам системасы менен саламаттык сактоону бекемдөө долбоорлорун кошкондо 20%.
Санариптештирүү жана өзгөчө кырдаалдар тобокелчиликтерин башкаруу – Digital CASA жана жаратылыш кырсыктарына турктуулукту жогорулатуу боюнча демилгелерди кошо алганда 10%.
