Бишкекте экологиялык сот адилеттиги боюнча эл аралык конференция өттү
Эл аралык иш-чарада экологиялык укуктарды сот аркылуу коргоо, эл аралык тажрыйбаны улуттук соттук практикага киргизүү жана жаратылыш ресурстарын сактоо маселелери талкууланды. Бул тууралу Жогорку соттун басма өз кызматынан кабарлашты.
Ага Кыргызстандын, Казакстандын, Өзбекстандын, Бельгиянын жана Түштүк Африканын сот тутумдарынын өкүлдөрү, эл аралык эксперттер жана экологдор катышышты.
Жогорку соттун төрагасы Медербек Сатыев өз сөзүндө жарандардын экологиялык укуктарын камсыз кылууда жана өлкөнүн жаратылыш байлыктарын келечек муундар үчүн сактоодо сот тутумунун негизги ролун баса белгилеп өттү.
«Сот адилеттигин жүзөгө ашыруу жаатындагы кесиптик ишибиз менен катар, сот коомчулугу жаратылышты сактоого жеке салым кошууну да көздөп жатат. Быйыл Ысык-Көл облусундагы “Фемида” пансионатынын аймагына “Жашыл мурас” улуттук демилгесин колдоо максатында бак-дарактарды отургузууну пландап жатабыз” – деди төрага.
Конференциянын жүрүшүндө катышуучулар эл аралык экологиялык сот адилеттигинин актуалдуу маселелерин, Туруктуу өнүгүү максаттарын ишке ашырууну, Кыргызстандын климаттык саясатын, сот практикасында илимий ыкмаларды жана заманбап технологияларды колдонууну, ошондой эле экологиялык адилеттүүлүккө жеткиликтүүлүктү камсыз кылууда жарандык коомдун ролун талкуулашты.
