Кыргызстан менен Армения билим берүү тармагындагы кызматташууну бекемдейт
Президент Садыр Жапаровдун Арменияга болгон расмий сапарынын алкагында КРнын агартуу министри Догдуркүл Кендирбаева, Илим, жогорку билим берүү жана инновациялар министри Гульзат Исаматова Армениянын билим берүү, илим, маданият жана спорт министри Жанна Андреасяндын катышуусунда үч тараптуу жолугушуу өткөрүштү.
Жолугушууда билим берүүнү санариптештирүү, педагогикалык кадрларды даярдоо жана алардын квалификациясын жогорулатуу, ошондой эле окутуунун заманбап усулдарын жана билим берүү технологияларын киргизүү жаатында тажрыйба алмашуу маселелери талкууланды.
КРнын агартуу министри Догдуркүл Кендирбаева Армениянын билим берүү, илим, маданият жана спорт министри Жанна Андреасян менен биргеликте TUMO креативдүү технологиялар борборунда болушту.
Алар борбордун ишмердүүлүгү, билим берүү программалары, окуучулардын санариптик жана чыгармачылык көндүмдөрүн өнүктүрүүгө багытталган инновациялык ыкмалары менен таанышып чыгышты.
Агартуу министрлигинин маалыматына караганда, расмий сапардын алкагында Агартуу министри менен Армениянын Билим берүү, илим, маданият жана спорт министрлигинин ортосунда билим берүү тармагындагы кызматташтык жөнүндө макулдашууга кол коюу пландаштырылууда.
Документ мектептик жана баштапкы кесиптик билим берүү тармагындагы кызматташтыкты өнүктүрүүнү, эки өлкөнүн билим берүү уюмдарынын ортосундагы өнөктөштүк байланыштарды чыңдоону, педагогикалык кызматкерлерди даярдоо жана алардын квалификациясын жогорулатуу жаатында тажрыйба алмашууну ишке ашырууну карайт.
