Асман шаарынын курулушу расмий башталды
Ысык-Көл облусунда мамлекеттин жетекчилигинин өкүлдөрүнүн катышуусунда Асман шаарынын курулушун баштоо иш-чарасы болду. Бул шаар долбоору Кыргызстан тарыхындагы эң масштабдуу долбоорлордун бири.
Инвестициялар боюнча улуттук агенттиктин маалыматы боюнча шаар курулушу этап-этап менен жүргүзүлөт жана долбоорду жеке компаниялар ишке ашырат.
Аталган агенттиктин жетекчиси Равшан Сабиров бир фирмага 100 гектар, а экинчисине 80 гектар жер бөлүнүп берилгенин маалымдады. “Биз шаарды курууга бардык курулуш компанияларын чакырып жатабыз. Бардыгына шарт бирдей. Кимде ким өзүнүн долбоорун жана инновациялык идеяларын ишке ашыргысы келсе Асман дирекциясына кайрылса болот”,-дейт ал.
Эске салсак, буга чейин Elite House фирмасы курулуш үчүн 100 гектар, долбоордун башкы өнөктөшү болуп дайындалган кытайлык компания 50 гектар жер алганы маалым болгон.
Асман өнүккөн инфраструктурасы, турак жай кварталдары, эс алуу зонасы жана инновациялык башкаруу технологиялары бар заманбап шаар катары эсептелет.
2023-жылы Президент Садыр Жапаров 500-700 миң жашочуга эсептелген, экологиялык жактан таза шаардын курулушуна капсула салган. Бирок, эл аралык өнөктөштөр долбоорго “жашыл шаарды” түзүү боюнча өзгөртүүлөрдү сунуштагандыктан инвесторлор менен болгон келишим жокко чыгарылган.
