Келечекте Суусамырдагы алтыгана бадалын кайра иштетип, тоют, жер семирткич чыгарылат
Суу ресурстары, айыл чарба жана кайра иштетүү өнөр жайы министри Бакыт Төрөбаев Кытайдын Ганьсу провинциясынын Элдик саясий консультативдик кеңешинин төрагасынын орун басары Хо Вэйпин баштаган делегация менен жолукту.
Жолугушууда Кыргызстан менен Кытайдын ортосундагы агроөнөр жай тармагындагы кызматташуу маселелери талкууланды. Анда жашылча-жемиштердин жана дарылык касиети бар өсүмдүктөрдүн үрөндөрүн өндүрүү боюнча кызматташууга өзгөчө көңүл бурулду.
Маселен, Ганьсу провинциясы айыл чарба өсүмдүктөрүнүн үрөнү менен Кытайдын 70 пайызын камсыздайт жана илимий изилдөө институттары менен да белгилүү.
Ошондуктан жолугушууда Кыргызстандын Суусамыр өрөөнүндөгү алтыгана бадалы менен күрөшүү маселеси сөз болду. Анда жайыттарды ээлеп жаткан тикендүү алтыгана бадалын жок кылуу гана эмес, аны кайра иштетүү жолу менен тоют жана жер семирткич чыгаруу боюнча биргелешкен ишкана куруу сүйлөшүлдү.
Ошондой эле картошка өстүрүүдө Кыргызстанды Кытайдын атайын техникалары менен камсыздоо, тажрыйба алмашуу жана жогорку квалификациялуу адистерди даярдоо сүйлөшүлдү.
