АКШда кыргыз-америкалык Ишкердик кеңешинин тегерек столу өттү
Экономика жана коммерция министри Бакыт Сыдыков Президент Садыр Жапаровдун Америка Кошмо Штаттарына болгон иш сапарынын алкагында кыргыз-америкалык Ишкердик кеңешинин тегерек столун өткөрүп, эки тараптуу экономикалык кызматташтыкты өнүктүрүү маселелерин талкуулады. Бул тууралуу Министрликтин маалымат кызматынан билдиришти.
Жолугушууда тараптар эки өлкөнүн ортосундагы инвестициялык кызматташтыкты кеңейтүү, соода алакаларын бекемдөө жана жаңы долбоорлорду ишке ашыруу маселелерин талкуулашты.
Министр Бакыт Сыдыков Кыргызстан стратегиялык инвестициялар үчүн ачык мамлекет бойдон кала берерин белгилеп, чет элдик өнөктөштөргө бизнес жүргүзүүдө ачык-айкын шарттар, туруктуулук жана мамлекеттик колдоо көрсөтүлөрүн билдирди.
Ошондой эле ал өлкөдө жүрүп жаткан реформалар экономиканын туруктуу өсүшүнө өбөлгө түзүп жатканын, мындан ары да кыргыз-америкалык ишкердик өнөктөштүк чыңдала берерине ишеним артты.
