АКШ менен Кыргызстан кандай келишимдерди түзүүгө жетишти?
АКШ президенти Дональд Трамп менен Кыргызстан президенти Садыр Жапаровдун жолугушуусунан соң Америка Кыргызстан менен өнөктөштүктү чыңдоого багыт алганын АКШ мамлекеттик департаменти билдирди.
Аталган департаменттин маалымдашынча, лидерлер саясий жана экономикалык байланышты чыңдоо боюнча баарлашышкан. Ошондой эле америкалык жана кыргыз компанияларынын ортосунда Вашингтондун эсеби боюнча миллиарддаган доллар экспорттук киреше менен миңдеген жумушчу орунду камсыздай турган ири коммерциялык макулдашуулар кабыл алынган.
Жарыяланган макулдашуулардын арасында – All American Rail Group менен “Кыргыз темир жолуУлуттук компаниясы” мамлекеттик ишканасынын ортосундагы темир жол куруу жөнүндөгү келишим да бар.
Ошондой эле Citi компаниясы менен “Айыл Банк” кызматташуу меморандумуна кол койгон. Oppenheimer компаниясы “Айыл Банктын” 5 жылдык камсыздалбаган баалуу кагаздык займын 300 млн долларга баалуу кагаздар базарына жайгаштыруу келишимин түзгөн.
Ошондой эле мамлекеттик департамент америкалык авиакомпаниялардын Борбор Азияда болуусун күчөтүүчү жана эл аралык авиа жүк ташууларды кеңейте турган Ачык асман тууралуу макулдашууну аягына чыгаруу прогресси жөнүндо маалымдаган.
