Адал продукцияларына сертификат берүү талаптары күчөтүлөт
Өлкөдө адал продукцияларына сертификат берүү талаптары күчөтүлөрүн “Биринчи радио” эфиринде Экономика жана коммерция министрлигинин халал-индустриясын өнүктүрүү боюнча борборунун директору Алмаз Кайырбеков билдирди.
Анын айтымында, мындай сертификаттарды берүү менен алектенген уюмдарды аккредитациялоого талаптар жогорулатылат. Бул өзгөртүүнүн максаты – эл аралык нормаларга стандартттарды тууралоо жана талаптарга жооп бербеген товарларды рыноктон чыгаруу.
Буга улай ал желатин же азыктык боекторго окшогон айрым ингредиенттердин кайдан өндүрүлгөнүнө лабораториялык текшерүү жүргүзүү талап кылынарын айтты.
“Бул диний гана аспект эмес, экономикалык маанилүү ресурс. Халал-индустрия миллиардаган рынок жана Кыргызстан бул секторду активдүү өнүктүрүшү керек”,-дейт ал.
