Кыргызстан быйыл тез өнүгүп жаткан өлкөлөр катарына кириши мүмкүн
Кыргызстан 2025-жылдын жыйынтыгы боюнча дүйнөдөгү экономикасы тез өнүгүп жаткан 5 мамлекеттин катарына кириши мүмкүн экендигин Казакстандын inbusiness.kz сайтына шилтеме кылуу менен “Кабар” агенттиги жазды.
Аталган сайт 2025-жылдын январь–сентябрь айларында Кыргызстандын ИДПсы 10%га өсүп, дүйнөдөгү эң жогорку темпти көрсөткөнүн маалымдаган.
Дүйнөлүк банктын жаңы божомолу боюнча 2025-жылдын жыйынтыгында Кыргызстандын экономикасынын өсүшү 10,3 пайызга жетип, дүйнөдөгү эң тез өнүгүп жаткан өлкөлөрдүн ТОП-5ине кириши мүмкүн.
Аналитиктердин баамында, мындай өсүшкө ички суроо-талаптын жогорулашы, кызмат көрсөтүү тармагынын жана курулуштун активдүү өнүгүшү, ошондой эле алтындын баасынын тарыхый деңгээлге көтөрүлүшү себеп болгон. Бирок эксперттер белгилешкендей, геосаясий кырдаал жана тышкы рыноктордогу өзгөрүүлөр Кыргызстанга инвестиция агымын жайлатышы мүмкүн.
Адистердин айтымдарында, Кыргызстандын артыкчылыгы — экономикасынын нефтке көз каранды эместиги. Негизги өнүгүү булактары — кызмат көрсөтүү жана кайра иштетүү өнөр жайы.
