Кыргызстанда 1,5 миллиондой жаран салыктарды онлайн төлөйт
Өлкөдө 1,5 миллионго жакын жаран салык төлөөчүнүн жеке кабинетин онлайн колдонуп жатканын Мамлекеттик салык кызматынын төрагасынын орун басары Мирлан Рахманов "Биринчи радионун" түз эфиринде билдирди.
Анын айтымында, салык төлөө процесстерин санариптештирүүнүн натыйжасында жеке кабинет жана мобилдик тиркемелер аркылуу аралыктан салык төлөө мүмкүнчүлүгү ишке ашырылган.
“Мурда жарандар салык органдарына барып кезек күтүп, документ толтурууга бир топ убакытысын коротушса, бүгүнкү күндө бардык маалыматтар жана төлөмдөр онлайн түрдө жеткиликтүү.
Салык төлөөчүнүн жеке кабинетинде карыздар, төлөө мөөнөттөрү, төлөнө турган суммалар боюнча толук маалыматты алуу мүмкүнчүлүгү түзүлгөн",- деп баса белгиледи Рахманов.
Ошондой эле ал жарандардын салык төлөө маданияты жогорулаганынын, салык кызматына болгон жарандардын ишенимин арттырууга багытталган иш-чаралардын натыйжалары байкалып жатканын баса белгиледи.
