Мамлекеттик салык кызматы 10 айда 310 млрд сом чогултту
Мамлекеттик салык кызматы быйыл январь-октябрь айларында салык жана социалдык камсыздандыруу төгүмдөрүн пландан ашык чогултту. Бул тууралуу Салык кызматынын төрагасынын орун басары Мирлан Рахманов "Биринчи радиого" берген маегинде билдирди.
Анын айтымында, 10 айдын жыйынтыгы боюнча жалпы 310,4 млрд сом каражат чогултулду. Пландык көрсөткүч 104,3%га аткарылып, 12,7 млрд сомго көп жыйналды. Өткөн жылдын ушул мезгилине салыштырмалуу салык жана камсыздандыруу төгүмдөрү 73,2 млрд сомго көбөйүп, өсүү ыргагы 130,9% болду.
Рахманов салык түшүүлөрүнүн өсүшү салык жүгүн күчөтүү аркылуу эмес, салык төлөөчүлөрдүн базасын кеңейтүү, процесстерди санариптештирүү жана салыкты ыктыярдуу төлөө деңгээлинин жогорулашы менен камсыз болгонун белгиледи.
Анын айтымында, республикалык жана жергиликтүү бюджеттерге түшкөн салыктык каражаттар 10 ай ичинде 243 млрд сомдон ашты, өткөн жылга салыштырмалуу 66 млрд сомго көп, өсүү 137% түздү. Ошондой эле социалдык камсыздандыруу төгүмдөрү 10 ай ичинде 66 млрд сомдон ашып, өткөн жылга караганда 6,7 млрд сомго өскөн.
Бул көрсөткүчтөр бизнес үчүн ыңгайлуу шарт түзүү жана салык тутумунун туруктуу өнүгүп жатканын тастыктоочу натыйжа экенин белгиледи.
