Кант кызылчасы Кыргызстанда 85,9% жыйналды
Кыргызстанда учурда кант кызылчасы 85,9 пайыз жыйналып, 431,7 миң тонна продукция алынганын Суу ресурстары, айыл чарба жана кайра иштетүү өнөр жайы министрлигинин өсүмдүк өстүрүү, багбанчылык жана кооперация башкармалыгынын башчысы Туратбек Идрисов “Биринчи радионун” түз эфиринде билдирген.
Анын айтымында, республика боюнча быйыл кант кызылчасы 13 миң 400 гектар жерге айдалса, анын 500 гектары Талас, 50 гектары Ысык-Көл, калганы Чүй облустарында эгилген.
“Кыргызстанда дыйкандар кант кызылчасын гана 100 пайыз кепилдик менен айдашат. Бизде “Кошой” жана “Кайыңды Кант” заводдору бар. Алар жыл башынан баштап кызылча айдайм деген дыйкандар менен келишим түзөт. Ошол келишимдин негизинде завод дыйкандарга үрөн, отоо чөптөргө каршы дарысын берет. Ошонун негизинде күзүндө кызылчаны толугу менен заводдор сатып алышат. Дыйкандар түзүлгөн келишимдин негизинде төккөн түшүмүнүн 30 пайызын акчалай, 70 пайызын кумшекер түрүндө алышат”,- деди Идрисов.
Белгилүү болгондой, эки завод күнүнө 16-17 миң тоннадан кант кызылчасын кабыл алып жатат. Эки завод биригип бир суткада 6-6,5 миң тонна кант кызылчасын кайра иштете алат.
