Өлкөдө 40 миң 968 адам расмий жумушсуз деп катталган
Кыргызстанда 40 миң 968 жаран расмий жумушсуз деп катталганын Эмгек, социалдык камсыздоо жана миграция министрлигинин Иш менен камсыздоого көмөктөшүү боюнча чечимдерди даярдоо башкармалыгынын жетектөөчү адиси Садаткүл Мукамбетова “Кабар” маалымат агенттигинин “Элден собол” берүүсүнүн түз эфиринде билдирди.
Анын айтымында, бул мыйзам чегинде документтери туура болуп, расмий түрдө катталган жарандар. Ал эми жалпы жумуш издеп кайрылгандардын саны болсо 59 миң 600 адамды түзөт.
“Расмий түрдө жумушсуз деп турган жарандарыбызга атайын министрлик тарабынан уюштурулган маалымдоо иш-чараларыбыз бар. Мурда ушул расмий түрдө катталган жарандарыбызды эле активдүү иш-чараларга тартып келгенбиз. Учурда жалпы жумуш издеп жаткандарды дагы бул иш-чараларга катыштырып жатабыз. Аларга дагы толук кандуу маалымат берип жатабыз”,-деди ал.
Мукамбетова белгилегендей, министрликтин аймактарда атайын Иш менен камсыздоо бөлүмдөрү бар.
