АӨБ Борбор Азиядагы долбоорлорго 10 млрд доллар инвестиция салууну пландоодо
Азия өнүктүрүү банкы (АӨБ) Борбор Азиянын регионалдык экономикалык кызматташтык (БАРЭК) программасына колдоону күчөтүп, 2030-жылга чейин долбоорлор жана демилгелер үчүн 10 миллиард АКШ долларынан ашык инвестиция салууну пландап жатканын жарыялады. Бул тууралуу Экономика жана коммерция министрлигинен билдиришти.
Бул билдирүү Бишкекте өткөн БАРЭКтин 24-Министрлер конференциясында жасалды. АӨБнын Президенти Масато Канда экономикалык жана экологиялык жактан туруктуу, социалдык инклюзивдүү жана санариптик жактан туташкан аймак куруу багытында бул каражаттын пайдаланыла турганын белгиледи.
Конференцияда БАРЭКке мүчө өлкөлөр төрт негизги стратегияны – Транспорт стратегиясы 2030, Интеграцияланган соода күндеми 2030, Санариптик стратегия 2030 – макулдашты. Алар аймактык туташууну жакшыртып, сооданы диверсификациялоого жана санариптешүүнү тездетүүгө багытталган.
Ошондой эле, Алматы–Бишкек экономикалык коридорунун чек ара кызматтарын жаңыртуу жана Казакстан менен Кыргыз Республикасынын ортосундагы үч көзөмөл-өткөрмө пунктун энергия натыйжалуулугу жагынан модернизациялоо долбоору бекитилди. БАРЭК бизнес-форуму 200дөн ашык жеке сектор, өкмөт жана өнүктүрүү өнөктөштөрүн бириктирип, экономикалык өсүштүн жана климаттын туруктуулугунун мүмкүнчүлүктөрүн талкуулаган.
Кийинки Министрлер конференциясы 2026-жылы Монголияда өтүп, БАРЭКтин 25 жылдык мааракесин белгилейт. АӨБ 1966-жылдан бери 69 мүчөгө кызмат көрсөтүп, аймакта инклюзивдүү жана туруктуу өсүштү колдоп келет.
