АӨБ Кыргызстанга 700 млн каржылык колдоо көрсөтүүгө даяр
Азия өнүктүрүү банкы 2025–2027-жылдары Кыргызстанга 700 млн доллар өлчөмүндө каржылык колдоо көрсөтүүгө даяр экенин аталган банктын президенти Масато Канда маалымат жыйынында билдирди.
Анын айтымында, Кыргызстан акыркы жылдары макроэкономикалык туруктуулукту камсыздап, оң көрсөткүчтөргө жетишип жатат. Бул АӨБ үчүн Кыргызстан менен кызматташтыкты улантууга негиз болот.
“Кыргызстандын экономикасынын өсүшүнө болгон ишенимибиздин далили катары биз 2025–2027-жылдар аралыгында 700 млн доллар бөлүүгө даярбыз”,- деди ал.
Масато Канда белгилегендей, өнүгүү үчүн үч негизги багытты эске алуу маанилүү.
“Алар 2030-жылга чейинки Улуттук өнүгүү программасынын ийгиликтүү аткарылышы, жеке секторду кеңири колдоо жана ири инвестициялык долбоорлорду ишке ашыруу. АӨБ бул багыттар боюнча
Кыргызстанга ар тараптуу колдоо көрсөтүүгө даяр.
Биз чакан жана орто бизнести, ошондой эле ири инфраструктуралык долбоорлорду колдойбуз. Келечекте биздин кызматташтыгыбыз мындан да бекемделет деп ишенем”,- деди ал.
