“Базар” системасы киргизилгенден кийин 10 айда 727 млн сомдон ашык салык жыйналды
Мамлекеттик салык кызматы “Дордой” соода-базар комплексинде киргизилген “Базар” маалыматтык системасынын жыйынтыктарын жарыялады. Система пилоттук долбоор катары 2025-жылдын 15-мартынан 15-августуна чейин ишке ашырылган. Бул тууралуу аталган ведомстводон билдиришти.
Бул долбоордун негизги максаты — базар администрациясын салык агенти катары таануу, ишкерлердин салыктык милдеттенмелерин жана камсыздандыруу төгүмдөрүн санариптик жол менен эсепке алуу жана көзөмөлдөө. Жаңы платформа аркылуу салык төлөмдөрүн төлөө, карыздарды онлайн мониторингдөө, соода объекттерин эсепке алуу жана документтерди тапшыруу кыйла жөнөкөй жана ачык болду.
“Базар” системасынын негизги артыкчылыктары:
- бардык соода түйүндөрү жана ижарачылар онлайн эсепке алынды;
- салык, социалдык төлөмдөр жана ижара боюнча маалыматтар реалдуу убакыт режиминде мониторинг кылынат;
- карыздуу объекттер кызыл, төлөнгөн объекттер жашыл түстө көрсөтүлөт;
- онлайн банк операциялары жана арыздарды тапшыруу мүмкүндүгү камсыздалды.
Пилоттук долбоордун жыйынтыктары:
- 13 миң 697 салык төлөөчү катталды;
- 13 миң 890 соода объектиси санариптештирилди;
- салыктык түшүүлөр үч эсеге көбөйдү — мурун айына болжол менен 30 млн сом чогултулса, азыр 100 млн сомго жетти;
- 2025-жылдын 10 айында жалпы салык жыйымдары 727 млн сомдон ашты, жыл жыйынтыгы боюнча 1 млрд сомдон ашык каражат түшүүсү күтүлүүдө.
Ийгиликтен соң “Базар” системасы башка базарларга — “Кара-Суу” жана “Мадина”га да киргизилди. Кийинки кадам — санариптик платформаны Кыргызстандагы бардык базарларга жайылтуу.
Салык кызматы белгилегендей, бул система ишкерлердин жумушун жеңилдетип, ашыкча текшерүүлөрдөн сактайт жана мамлекеттин казынасын бекемдөөгө өбөлгө түзөт. Пилоттук долбоордун негизинде Салык кодексине өзгөртүүлөр киргизилип, базар администрацияларына өз аймагындагы салык төлөөнү көзөмөлдөө боюнча ыйгарым укуктар берилди.
