Айдоочулук күбөлүктү эми онлайн алмаштырса болот
Айдоочулук күбөлүктү алмаштыруунун жаңы онлайн форматы ишке киргизилгенин президенттин Иш башкармалыгына караштуу Транспорт каражаттарын жана айдоочулук курамды каттоо боюнча мамлекеттик борборунан билдиришти.
Маалыматка ылайык, эми айдоочулук күбөлүктү жарандар “Түндүк” мобилдик тиркемеси аркылуу алмаштыра алышат. Бул санариптик кызмат жарандардын убактысын үнөмдөп, мамлекеттик кызматтарды көрсөтүү процессин ыңгайлуу жана жеткиликтүү кылат.
Айдоочулук күбөлүктү “Түндүк” аркылуу кантип алса болот
- Айдоочулук күбөлүктү онлайн алмаштыруу үчүн “Түндүк” тиркемесине 083-формадагы медициналык маалымкат алдын ала жүктөлгөн болушу керек. Маалымкатсыз өтүнмө кабыл алынбайт;
- “Түндүк” тиркемесине кирип, Кызматтар” бөлүмүнө кирип, андан соң “Автотранспорт жана айдоо” бөлүмүн тандайсыз;
- “Айдоочулук күбөлүгүн алмаштырууга өтүнмө берүү” кызматын тандап, өтүнмө жөнөтөсүз;
- Тиркемеден жеке маалыматтарды тактап чыгып, “андан ары” баскычын басасыз.
- Айдоочулук күбөлүктү берүүчү уюмду тандап, колдонуу максатын белгилейсиз (алмаштыруу, кайра жаңы алуу ж.б.);
- Жеткирүү ыкмасын тандаңыз: – “ооба” — курьердик жеткирүү (дарегиңизди жана индексиңизди көрсөтүңүз), – “жок” — даяр күбөлүктү өзүңүз барып аласыз.
- Тиркеме аркылуу сүрөткө түшүңүз. Талаптар: камерага түз кароо, бетте жана кийимде көлөкө болбоосу, жарык, сапаттуу, баш кийимсиз (жоолукка уруксат берилет) болушу керек.
- Төлөм жүргүзүү: Бардык төлөмдөр QR-код аркылуу аткарылат. Тиркеме автоматтык түрдө QR-код түзүп берет, аны каалаган төлөм колдонмосу аркылуу сканерлеп төлөй аласыз.
Жыйынтыгында 2–3 иш күнү ичинде жаңы айдоочулук күбөлүк даярдалат. Документти алууда эски айдоочулук күбөлүктү тапшыруу милдеттүү.
