Кара-Суу районунда интеграцияланган ири долбоор ишке ашат
Бүгүн Инвестициялар боюнча улуттук агенттиктин директору Равшанбек Сабиров Кара-Суу районунда ишке ашырылуучу ири интеграцияланган долбоордун уюштуруучусу "Вэньц Компанинин" өкүлдөрү менен жолукканын “Кабар” маалымат агенттиги жарыялады.
Инвестициялык консорциумдун курамына эл аралык алдыңкы компаниялар — Qiyan Holdings Limited, "Ухай" компаниясы жана Bitmain Technology Ltd. кирет. Алар көмүр казып алуу, энергетика жана интеллектуалдык эсептөө технологиялары боюнча кеңири тажрыйбага ээ.
Долбоордо ири көмүр шахтасын, бир нече жылуулук электр станцияларын куруу, интеллектуалдык эсептөө борборунун инфраструктурасын түзүү жана эсептөө жабдууларынын интеллектуалдык тармагын жайгаштыруу каралган.
Жолугушуу учурунда долбоорду ишке ашыруунун негизги параметрлери, мамлекеттик-жеке өнөктөштүктүн мүмкүн болгон механизмдери жана мамлекеттик колдоо чаралары талкууланды.
Аймак үчүн долбоордун социалдык-экономикалык маанисине өзгөчө көңүл бурулуп, долбоор ишке ашса жаңы жумуш орундары түзүлүп, өндүрүштүк жана энергетикалык инфраструктура өнүгөрү айтылды.
