Бангладештик жумушчулар бийликтен жардам сурашты
Кечээ "Азаттык" Бангладештин 20дан ашык жараны редакцияга кайрылып, соңку үч айдан бери айлыгы тийбей, иш берүүчү ишке чыкпаган ар бир күн үчүн 2 миң сомдон айлыгынан кемитип, моралдык-психологиялык басым көрсөткөнүн айтышканын жарыялады.
Бангладештик жарандар тигүү цехинин ээси паспортторун алып койгондуктан, башка жерден иш таап кете албай же Бангладешке кайта албай жатканына даттанышкан. Буга улай алар үч айдан бери үйүнө акча жөнөтө албай, нан менен суу ичип отурганын айткан чет элдиктер кыргыз бийлигинен укугун коргоп берүүнү өтүнүшкөн.
Аларга иш берген цехтин кожоюну Улан Суеркулов болсо тигүү тармагында иш токтогону үчүн айлык берүүдө маселеси жаралганын моюнга алды. Бирок буга чейин чейин айлык төлөп келгенин жана мыйзам бузбаганын билдирген.
“МинКабдын маалыматында, 2024-жылы чет элдик эмгек мигранттардын эмгек квотасы 25 миңге жеткен. Анын 63% өнөр жай, курулуш жана транспорт тармагына берилген. Тоо-кен тармагы менен соода, тейлөө жана ишкердикке 13-14% туура келет. Эмгек мигранттарына бөлүнгөн квотадан тышкары, студенттик жана ишкердик визалар менен жүргөндөр миңдеп саналат” деп жазат “Азаттык”.
