Бакыт Төрөбаев агрардык сектордогу мамлекеттик кызмат көрсөтүүлөр санариптешерин айтты
Суу ресурстары, айыл чарба жана кайра иштетүү министри Бакыт Төрөбаев Digital Farmer Hackathon 2025 инновациялык иш-чарасында агрардык сектордогу мамлекеттик кызмат корсөтүүлөрдү санариптештирүү чаралары боюнча айтып берди.
Анын айтымында, ветеринардык системада бардык ветеринардык иш чараларды, лабораториялык диагностиканы, экспорттук сертификаттарды берүүнү жана текшерүүлөрдү жүргүзүүнү электрондук форматка өткөрүүчү “Тулпар” системасы киргизилет. Документтер менен изилдөөлөрдүн жыйынтыктарын жарандарга жеке кабинет аркылуу берүү пландаштырылып жатат.
“Биздин өлкөдө 20 млн баш ири мүйүздүү мал, кой, эчки жана канаттуу бар. Ири мүйүздүү малдын саны эле 2 млн баш. Алар жылына эки жолу эмделет – бул 4 млн контакт”,-дейт министр.
Буга улай ал бул тармакта 20 млн бизнес-процесстер бар экенин жана санариптештирүү ачыктуулукту камсыз кылып, фермерлердин ишин жеңилдетерин айтат. Министрдин билдиришинче, өлкөдө 400 миң фермер колдонгон 1,2 млн гектар сугат жер бар. 2023-жылы суу алуу төлөмдөрү 100 млн сом болгон болсо, жаңы системанын кириши менен 2024-жылдын 10 айында суу төлөмү боюнча акча түшүүлөр 380 млн сомго жеткен.
Мындан сырткары ведомство үрөндүк материал менен бакчалык продукциянын экспертизасы боюнча маалыматтык системаны иштеп чыгып жатат. Протоколдор, экспертизалар жана сертификаттар автоматтык түрдө түзүлүп, электрондук түрдө берилет. Кийинчерээк чарбаларга статус ыйгаруу жана мамлекеттик актыларды берүүнү санариптештирүү пландалып жатат.
Ошондой эле министр бул чечимдерди ишке ашыруу үчүн министрликке программалоо, аналитика жана дизайн жаатындагы адистердин сунуштары керек экенин айтат. Анын айтымында, хакатондо көрсөтүлгөн жакшы идеялар пилоттук режимде ишке киргизилип, ведомствонун маалыматтык системасына интеграцияланат.
