Финансылык сектордогу уюмдар 9 айда 64 млрд сом киреше табышты
Кыргызстандын экономикасынын финансылык секторундагы уюмдардын кирешеси 2025-жылдын январь-сентябрь айларында өткөн жылдын ушул мезгилине салыштырмалуу дээрлик эки эсе көбөйдү. Бул тууралуу Улуттук статистика комитетинин Финансы жана баалар башкармалыгынан билдиришти.
Маалыматка ылайык, 2025-жылдын 9 айында сектордогу ишканалар 64 миллиард сомдон ашык киреше алышты. Негизги өсүштү Улуттук банк камсыздады. Сектордогу субъекттердин болжолу боюнча 61%ы киреше тапса, 15%ы чыгымга учураган.
Кирешенин жана кардарлар базасынын өсүшү
Жыл башынан бери республиканын финансылык секторунда 555 уюм иштеп келди, алардын ичинде Улуттук банк, 21 коммерциялык банк, 515 банктык эмес финансылык-кредиттик уюм жана 18 камсыздандыруу компаниясы бар. Ушул жылдын январь-сентябрь айларында алардын жалпы кирешеси 168,2 миллиард сомду түздү. Бул көрсөткүч 2024-жылдын тиешелүү мезгилине салыштырмалуу 46%га (53,1 миллиард сомго) көп.
2025-жылдын сентябрь айынын аягында финансылык сектордун кардарлар базасы 22 миллионго жакындап, жыл ичинде 40%га (6 миллиондон ашык) өстү. Бул өсүш банктардын мобилдик банк тутумуна кошулган кардарларынын көбөйүшү, камсыздандыруу келишимдеринин санын көбөйтүү жана микро каржы уюмдары аркылуу онлайн-кредит берүү системасын өнүктүрүү менен байланыштуу.
1-октябрдагы коммерциялык банктар жана бакнктык эмес финансылык-кредиттик уюмдар боюнча жалпы ачык кредиттик портфель 524 миллиард сомдон ашты. Анын 88%ы банктарга таандык болду.
Кредит берүүнүн негизги багыттары:
- Жарандардын керектөө муктаждыктары — жалпы көлөмдүн 37 пайызы;
- Соода тармагы — 22,5%;
- Айыл чарба — 11,5%;
- Ипотека — 10,3%.
