Кыргыз фондулук биржасы акча каражаттарын жайгаштыруу боюнча аукцион өткөрөт
Кыргыз фондулук биржасы өзүнүн сервистик спектрин кеңейтип, өзүнүн аянтында акча каражаттарын коммерциялык банктар менен микрофинансылык компаниялардын депозиттерине жайгаштыруу боюнча аукцион өткөрөрүн КФБнын маалымат кызматы билдирди.
Баса белгилегендей, КФБ мындай аукциондорду өткөрүүдө ийгиликтүү тажрыйбага ээ.
“Алсак, Финансы министрлиги биржанын электрондук платформасы аркылуу банктарда 24 млрд сом жайгаштырган. Тооруктар 12 айдан 36 айга чейин 3 лот менен өткөрүлүп, аларга 12 коммерциялык банк катышты. Аукциондордун демилгечиси өзү пайыздык чендерди аныктап, эң пайдалуу шарттарды сунуштаган банкты тандайт. Тооруктардын мындай түрү – каражаттарды тез жайгаштыруунун жана депозиттерди пайдалуу чендер менен тартуунун эффективдүү инструменти”,-дейт КФБнын директорунун милдетин аткаруучу Аида Чодулова.
Баса белгиленгендей аукционго Улуттук банктан алынган лицензиясы бар, эки жыл бою чыгашасыз ишмердүүлүк кылган, тышкы аудит бүтүмүн алган, мөөнөтү өтүп кеткен салыктык карызы жана башка милдеттемелери жок уюмдар катыша алышат.
