14 жылдык тыныгуудан соң Экономика Кызматташтык уюму кайрадан жолугушту
2025-жылдын 24–26-ноябрь күндөрү Стамбул шаарында 14 жылдык тыныгуудан кийин Экономикалык кызматташтык уюмунун (ECO) 5-Жыйыны болуп өттү. Жыйын аймактык соода-экономикалык интеграцияны чыңдоого багытталып, ага Түркиянын соода министри Өмер Болат баштаган мүчө мамлекеттердин министрлери, орун басарлары жана дипломаттар катышты.
Иш-чарага Кыргыз Республикасынын атынан Түркиядагы Кыргызстандын Соода өкүлү Чыңгыз Эсенгул уулу катышып, өлкөнүн соода тармагынын санариптештирилиши, электрондук маалымат алмашуунун кеңейиши, бирдиктүү бажы стандарттарын өнүктүрүү жана ECOTA келишимин заманбап шарттарга ылайык жаңылоо боюнча приоритеттерин жана сунуштарын билдирди.
Үч күндүк программанын алкагында Жогорку деңгээлдеги адистер тобунун жыйыны жана министрлердин жолугушуулары өткөрүлүп, ECO мейкиндигинде экономикалык интеграцияны тереңдетүү, аймак ичиндеги соода жүгүртүүнү көбөйтүү, ошондой эле соода жана бажы тармагындагы кызматташууну кеңейтүү маселелери талкууланды.
Ошондой эле ECO аймагында эркин соода мейкиндигин түзүүгө багытталган жаңы жол карта бекитилди.
